ეკა კახიანი: "ნინი და ანასტასია ერთი კვირის შუალედით იმშობიარებენ"
მსახიობი და მომღერალი ეკა კახიანი ბებია ხდება და თანაც ერთდროულად ორი შვილიშვილის. მისი ქალიშვილები, ნინი ბადურაშვილი და ანასტასია თოფურიძე, ბავშვებს ერთი კვირის შუალედით გააჩენენ. დედა ბედნიერია, როცა შვილებს ამ მდგომარეობაში უყურებს. მოკლედ, იმედა კახიანის დიდი ოჯახი დიდი სიხარულის მოლოდინშია.
პარალელურად ეკა კახიანის ცხოვრებაში კიდევ ერთი სიახლეა, რომელმაც დამატებით დატვირთა ემოციებით. ეს არის საბავშვო მუსიკალური პროექტი "ახალი ხმა", სადაც ერთ–ერთ მწვრთნელად მიიწვიეს. ეკა იმხელა პასუხისმგებლობას გრძნობს, რომ ბავშვებთან არაფერი შეეშალოს, როგორც თავად გვითხრა, ღამეები აღარ სძინავს.
– ქალბატონო ეკა, ორი ქალიშვილი გაგითხოვდათ, სიძეები შეემატნენ თქვენს ოჯახს, რამდენიმე თვეში კი ორი ახალი წევრი დაიბადება. ერთბაშად ორი შვილიშვილის მოლოდინი როგორი ემოციაა?
– სასწაული გრძნობაა, როდესაც შენს შვილებს ამ მდგომარეობაში ხედავ! ნინი და ანასტასია ერთი კვირის შუალედით გააჩენენ შვილებს. ერთად დადიან, კუს ტბაზე ერთმანეთს ასეირნებენ, გამოცდილებას უზიარებენ წამლებთან და ვიტამინებთან მიმართებაში, ანალიზებსა და ექოსკოპიურ გამოკვლევებზეც ერთად დადიან. ასე ბევრად უადვილდებათ დროის გაყვანა. მათი შემხედვარე ძალიან ბედნიერი ვარ.
– ბავშვების სქესი იცით?
– ნინი ანასტასიაზე ერთი კვირით დიდი ორსულია, სავარაუდოდ, ივლისის ბოლოს ან აგვისტოს დასაწყისში უწევთ მშობიარობა. ნინი გოგოს ელოდება, ანასტასია – ბიჭს. ძალიან გახარებულები ვართ, როგორც იქნა, ოჯახში ბიჭი გვეღირსა. მინდოდა, ჩემი რომელიმე შვილისთვის გარდაცვლილი ძმის სახელი დამერქმია, მაგრამ სამი გოგო შემეძინა და ეს ვერ შევძელი. ჩემი ძმა, ლადო, ძალიან ლამაზი და ჭკვიანი ბავშვი იყო, ის 14 წლის ასაკში გადაიცვალა. მიხარია, რომ ლადო იბადება.
– ნინი რას დაარქმევს თავის გოგონას?
– ელენეს დარქმევას აპირებს.
– რომელი უფრო ჭირვეული ორსულია?
– ნინი უფრო ჭირვეულობდა, ორსულობის პირველი სამი თვე ტოქსიკოზი ჰქონდა. ანასტასიას კი არანაირი შეგრძნება არ ჰქონია, თვითონაც უკვირდა, ამბობდა, რატომ ვერაფერს ვგრძნობო. რაც მათავარია, ძალიან სწორად იკვებებიან. ქალებს ორსულობის დროს მომატებული კილოგრამები ხშირად აწუხებთ, ჩემი გოგოები კი ყოველ კილოგრამს აკონტროლებენ. ერთმანეთს ეუბნებიან, მე ამდენი გრამი მოვიმატე, შენ ჩემზე მეტიო. ამ დროს ძალიან სასაცილოები არიან. ცდილობენ, ძალიან არ მოიმატონ. ჭკვიანურად იქცევიან, ჯანმრთელი ცხოვრების წესით ცხოვრობენ, უნდათ, რომ მათი შვილები ჯანმრთელები იყვნენ.
– თქვენს ორსულობას რომელი ქალიშვილი გაგონებთ?
– ჩემს თავს უფრო ანასტასიას ვამსგავსებ, რადგან ჭირვეული ორსული არც მე ვყოფილვარ.
– ბევრ ახალგაზრდა ქალს არ უხარია, როცა ბებია ხდება, რადგან ეს მათთვის სიბერესთან არის გაიგივებული. თქვენ მსგავსი აზრი არასოდეს გაგჩენიათ?
– ეს არ მაშინებს. ისეთი შეგრძნება მაქვს, რომ ისეთივე ვარ, როგორიც 20 წლის წინ ვიყავი. როცა ჩემს თავს ვუყურებ, ვხვდები, რომ სერიოზული ცვლილებები და ტრანსფორმაცია არ განმიცდია. მომწონს, ბებია რომ გავხდები, თანაც ორი შვილიშვილი ერთდროულად დაიბადება. ბევრ კომპლიმენტს ვიღებ. სასიხარულოა, ამ ასაკში ბებიაც ვიყო და ბევრი კომპლიმენტიც მივიღო. ასე რომ, ეს ფაქტი კი არ მაშინებს, პირიქით, მახარებს. მთელმა საქართველომ ნახა, ჩემი 100 წლის ბებია როგორ გამოიყურება, ამიტომაც ეს არ მაშინებს.
– როგორი სიდედრი ხართ?
– ჩემი სიძეები ძალიან მიყვარს, მათთან ვმეგობრობ. ჩემთვის ძალიან საყვარელი ადამიანები, კარგი მეგობრები არიან. ტიპური სიძე–სიდედრის ურთიერთობა არ გვაქვს. ჩემგან ისინი გრძნობენ კეთილგანწყობას და მე – მათგან. დარწმუნებული ვარ, ბოლომდე ასე იქნება. ვერაფერს ვხედავ ისეთს, რომ ვიჩხუბო. პირიქით, ძალიან ბედნიერი ვარ, რომ ორი არაჩვეულებრივი სიძე მყავს – ირაკლი კუტალაძე და ირაკლი გაბაშვილი. ორივე ძალიან კარგი და სიმპათიური ადამიანია. რაც მთავარია, ჩემი შვილები მათ გვერდით ბედნიერად გრძნობენ თავს.
– თუმცა მას შემდეგ, რაც ფეხმიძმე ნინი მოსკოვიდან თბილისში ჩამოვიდა და ქმრისგან შორს ცხოვრობს, ხმა გავრცელდა, რომ ქმარს გაშორდა. ამ სიტუაციამ ხალხი აალაპარაკა.
– ნინი ხელოვანი ადამიანია, ხან მოსკოვში იქნება, ხან – თბილისში, ხანაც – სხვა ქვეყანაში. ირაკლიმ ეს იცის და ნინის ცხოვრების რეჟიმს შეგუებულია. "რუსთავი 2"–მა ნინის მოსკოვში დაურეკა და შესთავაზა, "საქართველოს ვარსკვლავში" მიეღო მონაწილეობა. ნინიმ მეუღლეს ჰკითხა, შენ წინააღმდეგო ხომ არ იქნები, რამდენიმე თვე თბილისში რომ ვიყოო და შეთანხმდნენ.
ჯერ იმაზე ატეხეს ერთი ამბავი, ნინი რატომ არ თხოვდებაო, არადა 26 წელი ისეთი ასაკი არ იყო, რომ ამით დაინტერესებულიყვნენ. ახლა გათხოვდა და ვერ გავიგე, რატომ უნდათ, რომ ქმარს გაშორდეს. ნინის მიმართ ყოველთვის არის განსაკუთრებული ინტერესი, ეტყობა, ძალიან მოსწონთ და უყვართ. მინდა, თქვენი ჟურნალის საშუალებით საზოგადოება დავაწყნარო და ვუთხრა, ღვთის წყალობით, ნინის და ირაკლის ცხოვრებაში ყველაფერი კარგად არის. ამ თემაზე ლაპარაკი არც მინდა.
ანასტასიას მეუღლე ახლა კიევშია, მაგრამ ეს იმას ხომ არ ნიშნავს, რომ ისინი გაშორდნენ?!
– თქვენს ოჯახში რამდენიმე თაობაა თავმოყრილი – თქვენი მშობლები, ბებია, თქვენი შვილები, ახლა მათი შვილებიც გაჩნდებიან... პირადად თქვენი როლი როგორია ამ დიდ ოჯახურ წრეში?
– ჩვენი ოჯახი ყოველთვის ყურადღების ცენტრშია, ფეხს ვერ გადადგამ ისე, რომ სრულიად საქართველოს განსჯის საგანი არ გახდეს. რადგან იმედას შვილი ვარ, ამ პასუხისმგებლობას ყოველთვის ვგრძნობ. ბაბუის მიმართ ჩემს შვილებსაც იგივე განცდა აქვთ. ჩვენ ტრადიციული ქართული წესებით ვცხოვრობთ.
რაც შეეხება ჩემს როლს ამ ოჯახში, ის არის, რომ ვარ ქართველი მეუღლე და დედა. ვცდილობ, ისე ვიცხოვრო, როგორც ჩემს ოჯახს და თავად მე მეკადრება. რა ასაკშიც უნდა ვიყო, ჩემი მშობლებისთვის ყოველთვის პატარა ვიქნები. ბედნიერი ვარ, რომ ფლორას და იმედას შვილი ვარ.
– თქვენს საქმიანობაში სიახლეა საბავშვო მუსიკალურ პროექტ "ახალი ხმის" სახით, სადაც მწვრთნელად მიგიწვიეს. ამან ოჯახთან ურთიერთობის დრო ხომ არ წაგართვათ?
– ფაქტობრივად სულ სახლში ვარ და ვმუშაობ. 24 საათი კომპიუტერთან ვიჯექი და ინტერნეტით რეპერტუარს ვარჩევდი. ასე რომ, ოჯახისთვისაც ვიცლიდი. ქალი მაშინ ხარ, როცა პირად ცხოვრებასაც ახერხებ და საქმესაც. ვცდილობ, არც ერთს დავაკლო რამე. დროს ყველაფრისთვის თანაბრად ვანაწილებ. როგორც მსახიობი, დროებით გაჩერებული ვარ. ამ ეტაპზე ამ პროექტში ვარ ჩართული, მაგრამ ამის ხარჯზე ოჯახს ნამდვილად არ ვაკლებ ყურადღებას და მზრუნველობას.
– სანამ "ახალ ხმაში" მიგიწვევდნენ, რას ფიქრობდით ამ პროექტზე?
– მართალი გითხრათ, ამ პროექტს დიდი ხანია ვუყურებ. სანამ საქართველოში გამოჩნდებოდა, უცხოურ ვერსიებს ინტერნეტით ყოველთვის ვადევნებდი თვალყურს. ეს პროექტი მთელ მსოფლიოში ძალიან პოპულარულია. საქართველოშიც მაღალი რეიტინგი აქვს. ერთი თვის წინ პროექტის პროდიუსერმა დათო იმედაშვილმა დამირეკა და საბავშვო "ახალი ხმის" მწვრთნელობა შემომთავაზა. ამ წინადადებამ ძალიან გამახარა. მერე, რომ დავფიქრდი, მივხვდი, ასჯერ უფრო საპასუხისმგებლოა ბავშვებთან მუშაობა, ვიდრე უფროსებთან, თუმცა ჩემი შესაძლებლობების მჯერა და ამიტომაც სიამოვნებით დავთანხმდი.
– რთული აღმოჩნდა ბავშვების მწვრთნელობა?
– პირველ რიგში, ხმამაღლა ვიტყვი, რომ არავის ინტერესი არ მაქვს. ობიექტური მწვრთნელი ვიქნები, სხვანაირად არც გამოვა და არც მეპატიება. ჩემი მთავარი მიზანია, ის 15 ბავშვი, რომლებიც ავირჩიე, სცენაზე კარგად წარმოვაჩინო. რამდენიმეზე ძალიან დამწყდა გული, მაგრამ რას ვიზამთ. ასაკობრივი ზღვარი 8 წლიდან 15 წლამდე იყო.
ბრმა კასტინგზე ძალიან ბევრი საფიქრალი იყო. რთული სამუშაოა, ბავშვებს უნდა აურჩიო სწორი რეპერტუარი, გაითვალისწინო მათი ვოკალური შესაძლებლობა, ტონალობა. თამამად შემიძლია ვთქვა, რომ ჩემს ცხოვრებაში არც ერთ პროექტზე არ მინერვიულია ამდენი, არც ამხელა პასუხისმგებლობა მიგრძვნია. ბავშვებთან მაქვს საქმე და მინდა, ყველაფერს მაღალ დონეზე გავართვა თავი. ამაზე ძალიან ბევრს ვფიქრობ და ვმუშაობ. შეიძლება ითქვას, რომ ღამეებიც აღარ მძინავს.
– გეთანხმებით, რომ ბავშვებს ძალიან ფაქიზი მიდგომა სჭირდებათ, როცა "ვერდიქტია" გამოსატანი. რა მეთოდებით მუშაობთ მათთან?
– პატარებს შევხვდი, ველაპარაკე, ავუხსენი, ეს არის კონკურსი, რომ ასეთი რამ ძალიან ბევრჯერ იქნება მათ ცხოვრებაში, კონკურსში კი ვიღაც იმარჯვებს, ვიღაც – ვერა, მაგრამ ეს იმას არ ნიშნავს, რომ გული უნდა გაიტეხო. ისიც ვუთხარი, რომ ყველაფერი მათზეა დამოკიდებული. მეც თავისთავად შევეცდები, მათი ნიჭის რეალიზება მოვახდინო, მათი საუკეთესო მხარე მაყურებლამდე მივიტანო. ვასწავლი სცენაზე დგომას. ყველა ტურის წინ ძალიან დიდი მღელვარებაა, კონკურსანტებმა ისიც უნდა ისწავლონ, თუ როგორ მოერიონ ემოციებს. ასე რომ, დიდი სამუშაო მაქვს ჩასატარებელი და არამარტო – სიმღერაში. მათთან ფსიქოლოგიური მუშაობაცაა საჭირო.
– პატარა კონკურსანტებთან მკაცრი ალბათ არ იქნებით.
– მკაცრი – არა, ობიექტური ვიქნები. ბავშვებთან ძალიან თბილი და მეგობრული ურთიერთობა მაქვს, დარწმუნებული ვარ, ბოლომდე ასე იქნება. მათი გამოსვლის მიხედვით მივიღებ გადაწყვეტილებას და, მგონი, ჩემ მიმართ წყენა არ ექნებათ.
– კონკურენტ მწვრთნელებზე რას ფიქრობთ? სამუშაო პროცესში როგორები არიან სტეფანე და დათო ფორჩხიძე?
– წლებია დათოს და სტეფანეს ვიცნობ, მათთან მეგობრული ურთიერთობა მაქვს, როგორც მუსიკოსებს, დიდ პატივს ვცემ. რა თქმა უნდა, ჩემთვის სასიამოვნოა მათთან მუშაობა და კონკურენციის გაწევა. პროექტში მარტო ბავშვებს შორის კი არ იქნება კონკურენცია, მწვრთნელებს შორისაც. საინტერესოა, ვისი გუნდი უკეთ აჩვენებს შოუს, ვინ უფრო კარგად წარმოაჩენს კონკურსანტებს.
მართალია, ისინი, უკვე მეორე სეზონია, ამ პროექტზე მუშაობენ, მაგრამ მე არ მეშინია. მიმაჩნია, რომ ამ სფეროში და ზოგადად საკონკურსო ცხოვრებაში, დიდი სტაჟი და გამოცდილება მაქვს. როგორც პროდიუსერმაც, შემიძლია თამამად ვთქვა, რომ ეს საქმეც გამომდის. ნინი ბადურაშვილის, რომელიც წარმატებული მომღერალია, არაოფიციალური პროდიუსერი ვიყავი. მას მე მოვკიდე ხელი, სცენაზე დავაყენე, ყველანაირად სწორი სვლები გავაკეთე, შევურჩიე სწორი რეპერტუარი, იმიჯი, კლიპები, კონცერტები. შესაბამისად, არც ახლა ვარ დაბნეული და შეშინებული, პირიქით, ეს ჩემთვის საოცრად აზარტულია.
– "რუსთავი 2"–ის, ასე ვთქვათ, კონკურენტულ პროექტ "საქართველოს ვარსკვლავის" ჟიურიში თქვენი ქალიშვილი ნინი ბადურაშვილი ზის. დედა–შვილსაც გაქვთ ერთმანეთთან კონკურენცია თუ პირიქით, ერთმანეთს ეხმარებით?
– ნინი, ჩემგან განსხვავებით, იოლ პოზიციაზეა. ის არის უბრალოდ ჟიური, მე კი მწვრთნელი ვარ. მისი ფუნქციაა, კონკურსანტი შეაფასოს, მათ რეპერტუარს არ ურჩევს, მათთან არ მუშაობს. იმ პროექტში ვოკალის არაჩვეულებრივი მასწავლებლები არიან, რომლებიც ბავშვებთან მუშაობენ. ერთი–ორჯერ ხუმრობით ვუთხარი, ადგილი გამიცვალე–მეთქი. ჩემი ამპლუა მართლაც რთულია.
რამდენიმე დღის წინ ნინიმ სახლში მოიტანა 80 კონკურსანტის ჩანაწერი, ყველას სათითაოდ არაერთხელ მოუსმინა, ფიქრობდა, რომელი გადაეყვანა შემდეგ ტურში. წარმოიდგინეთ, 80 ბავშვის მოსმენა რა სირთულესთან არის დაკავშირებული. რა თქმა უნდა, მასთან ერთად მეც ვუსმენდი და ჩემს აზრსაც ვუზიარებდი. ჩემთვის მნიშვნელოვანია, რომ ნინი ბავშვებთან ურთიერთობაში დამეხმაროს. მოკლედ, ჩვენ ერთმანეთს ვეხმარებით, სახლში კონკურენტები არ ვართ.
